Fara úr Starsvmannafelagnum undir danskt felag

Flogternurnar hjá Atlantic Airways vilja heldur vera undir einum donskum fakfelag enn í Starvsmannafelagnum.

Tær hava annars bara verið í Starsmannafelagnum í góð tvey ár. 

Starvsmannafelagið sigur seg hava fingið at vita frá flogternunum, at orsøkin til hetta stigið er ikki misnøgd við Starvsmannafelagið.

Men flogternurnar halda, at tær fáa meira burtur úr at skipa seg í egið fakfelag undir danska fakfelagnum FPU, Flyvebranchens Personale Union.

Sáttmálin longdur

Starvsmannafelagið hevur sáttmála við Arbeiðsgevarafelagið um flogternurnar til 1.november í ár.

Men nú hava Starvsmannafelagið og Arbeiðsgevarafelagið longt tann sáttmálan eitt ár.

Lønarhækkingin 1.november í ár er 3,26 prosent, sum er ein framskriving.

Sáttmálin er tó hetta árið bara galdandi fyri flogternur, sum vilja vera limir í Starvsmannafelagnum.

Sáttmálin var ein økissáttmáli, tað er, at hann var galdandi fyri øll starvsfólkini, bæði fyri limir í Starvsmannafelagnum og tey, sum ikki eru limir har.

Nú er hann bara galdandi fyri limir í Starvsmannafelagnum.