Oljuprísurin lækkar

Óvissan um, hvussu tey 24 londini í OPEC fara at virka eftir avtaluni um at lækka søluna av olju, og um oljusølan úr USA fer at hækka, fær oljuprísin at lækka.

Í gjár lækkaði oljuprísurin aftur, eftir at hann hækkaði seinast í farnu viku, eftir semjuna í OPEC um at minka um søluna av olju.

Oljuprísurin er lækkaður við umleið einum triðingi síðani í oktober, tá prísurin var tann hægsti í fýra ár.

Gongdin seinastu dagarnar bendir á, at avtalan hjá OPEC kanska ikki er nóg mikið fyri at fáa prísin at hækka aftur.

Í morgun kostar ein tunna av olju úr Norðsjónum góðar 60 dollarar. Tað er ein dollari minni enn seinnapartin í gjár.

Samstundis verður ein tunna av olju úr USA seld fyri góðar 51 dollarar, sum er ein hálvan dollara minni enn seinnapartin í gjár.