Legði hald á fundarfrásagnir

Tað skriva Washington Post, CNN og Fox News.

Fox News verturin Jeanine Pirro spurdi í gjár Donald Trump, hví ongar fundarfrásagnir vóru frá fundum hansara við Vladimir Putin, og til tað svaraði Trump, at hann og Putin høvdu eitt gott prát, og at hann einki hevur at fjala.

Men Washington Post skrivar eisini í gjár, at Donald Trump hevði strongt á at fjala smálutirnar í samrøðum hansara við Putin.

Sambært blaðnum skal Trump minst einaferð hava tikið frásøgnina frá tulkinum, sum var á fundinum, og givið øllum í rúminum boð um ikki at tosa við onnur í stjórnini um prátið teirra millum.

Søgan hevur sjálvandi vakt ans í amerikonskum miðlum. Demokratarnir halda tað vera eina gølu, at forsetin dylur fyri, hvat hann og Putin hava tosað um, men forsetin avsannar, at hann hevur fjalt upplýsingar.