49 fólk dripin í moskuálopi

49 fólk eru deyð og í minsta lagi 20 onnur eru løstað eftir skottilburðir í nýsælendska býnum, Christchurch, í nátt okkara tíð

Heilsustarvsfólk koyra ein særdan mann inn í ein sjúkrabil eftir álop á tvær moskur í nýsælendska býnum, Christchurch, í nátt okkara tíð

Mynd: AP

Beinta Løwe

Solby Christiansdóttir

15.03.2019 - 09:02

Løgreglan hevur handtikið fýra fólk, tríggjar menn og eina kvinnu, skrivar BBC News. Skottilburðirnir vóru inni og uttan fyri tvær moskur í nýsælendska býnum Christchurch.

Miðbýurin í Christchurch hevur eisini verið avbyrgdur, tí fleiri bumbur vórðu funnar í bilum ymsastaðni. Tann avbyrgingin er tikin burtur nú.

Greinin heldur fram niðanfyri

Video: Minst 40 fólk dripin í álopi á moskur (ensk tala)

- Vit hava ongantíð upplivað nakað líkandi fyrr, tí slíkt hendir ikki í okkara landi. Hetta er daprasti dagur í søguni hjá okkum, sigur Jacinda Ardern, forsætisráðharri, sambært blaðnum, The New Zealand Herald.

Myndugleikarnir hava heitt á allar moskur í býnum um at lata aftur, til onnur boð verða givin. Enn er ikki greitt, hvussu nógv fólk framdu álopið á tær báðar moskurnar.

- Tann eini álopsmaðurin er avstralskur. Hildið verður, at maðurin hevði skrivað eina yvirlýsing áðrenn álopini, har hann hevur greitt frá ætlanunum, skrivar BBC News.