14 ára gomul í FM finalu í badminton

Tá FM finalan hjá kvinnum í badminton verður spæld í Høllini á Hálsi, verður talan um eina finalu millum ein púra óroyndan finalist og ein sigursvandan finalist. 

14 ára gamla Adhya Nandi hevur spælt seg í finaluna í einmansleiki. Tað gjørdi hon við at vinna á verandi føroyameistaranum, Gunnvá Jacobsen, úr Havnar Badmintonfelagi. Her var talan um eitt sera óvæntað úrslit. 

Adhya Nandi fær uppaftur sterkari mótstøðu í finaluni, tí hon skal spæla í móti Rannvá Djurhuus Carlsson. Rannvá spældi seg í finaluna við at vinna á Almu Petersen, sum eins og Rannvá dagliga spælir í Lyngby, men umboðar Havnar Badmintonfelag í føroyameistarakappingini. 

Tað verður sostatt ein kvinnufinala millum tveir spælarar úr Havnar Badmintonfelagi. 

Bartal skal verja sítt meistaraheiti

Í einmansleikinum hjá monnunum verða tað Benjamin Gunnarstein úr Havnar Badmintonfelagi, og Bartal Poulsen úr Miðvágs Badmintonfelagi, sum møtast.

Benjamin Gunnarstein, HBF,  kom í FM finaluna við at vinna á  Áranti á Mýrini úr MBF í hálvfinaluni, meðan Bartal Poulsen, MBF og verandi føroyameistari  vann á  Magnusi Dal-Christiansen úr HBF.

Sostatt sleppur Bartal Poulsen at verja sítt meistaraheitið, tá hann skal spæla móti Benjamin Gunnarstein.

Finalurnar í badminton, borðtennis og judo verða spældar í Høllini á Hálsi í Havn leygardagin. Sjónvarpið sendir finalurnar beinleiðis frá klokkan 13.00.