Bakkafrost fingið loyvi at fylla grót á sjógv

Útfyllingin er 220 metrar long og upp til 40 metrar út úr sjóvarmálanum, út á fimm metra dýpi.

Útfylta økið verður 7.500 fermetrar. Bakkafrost Farming ætlar at fylla út fram við landi vestur úr økinum, har smoltstøðin er.

Talan er um at spreingja eitt øki inn í lendið oman fyri, har útfyllingin verður. Haðani fáast 25.000 rúmmetrar av gróti í føstum máti. 

Eisini skal grót fáast við at víðka grótbrotið í Depli. Her er talan um 32.500 rúmmetrar. Smoltstøð skal byggjast á útfylta økinum.

Flotbyrging tekur plastið

Hóast Umhvørvisstovan ikki krevur árinsmeting í hesum førinum, metir Umhvørvisstovan, at serstakliga plastútlát kann hava týðandi árin á umhvørvið.

Umhvørvisstovan bað tí Bakkafrost Farming um at søkja um umhvørvisgóðkenning. Tað gjørdi Bakkafrost Farming, og felagið hevur nú fingið umhvørvisgóðkenning til útfyllingina á Norðtoftum.

Bakkafrost Farming ætlar at leggja forðing á sjógv, sum skal taka spreingileidningar frá grótinum. Umhvørvisgóðkenningin kann kærast. Kærufreistin er til 21. august.