Ákærdur fyri at sigla við ov nógvum ferðafólkum

Føroya rættur fer 5. august at viðgera eitt mál um ov nógv ferðafólk, sum vóru við tvíkiljuni Issehoved úr Nólsoy til Havnar leygarkvøldið 26.mai í fjør.

Skiparin er ákærdur fyri at bróta lógina um trygd á sjónum. Hann játtar seg sekan.

Málið er endað í rættinum, tí ákæruvaldið vil hava rættin at áseta sektina, tí einki fordømi er.

Løgreglan stóð fyri Issehoved, tá tvíkiljan kom á Havnina, og fór um borð at gera kanningar. 

Tað vísti seg, at 114 ferðafólk vóru við henda túrin, men Issehoved hevði bara loyvi til at flyta 98 ferðafólk í senn.

Skiparin varð fyrst skuldsettur og seinni ákærdur fyri at hava 16 ferðafólk ov nógv umborð hendan túrin.