Kvoturnar skerjast í 2020

Uppskotið fer av álvara at máa grundarlagið undan nógvum donskum fiskimonnum, sigur Danmarks Fiskeriforening.

Serliga uppskotið um at skerja toskakvotuna í vestara parti av Eystrasalti ørkymlar danska felagið. Sambært felagnum, fer uppskotið longri enn tilmæli frá lívfrøðiligu ráðgevingini.

Fiskiskapurin bannast til apríl

– Í ár hækkaði kvotan við 70 prosentstigum, og nú verður skotið upp, at kvotan skal lækka við 68 prosentstigum. Vit kunnu ikki liva við hesum yo-yo-kvotum, sum hvørki gagna fiskimonnum ella fiskastovninum

Tað sigur Kim Kær Hansen, næstformaður í Danmarks Fiskeriforening, í tíðindaskrivi.

ES-nevndin skjýtur eisini upp, at banna fiskiskapi eftir toski fyrstu tríggjar mánaðirnar í árinum. Men danska felagið undrast, tí tað fer ikki at ávirka menningina av stovninum.

Samráðast um ein mánað

– Tað gevur ongan meining fyri fiskimenninar, at bann verður sett fyri fiskiskapi týdningarmestu mánaðirnar á árinum, sigur Kim Kær Hansen í tíðindaskrivinum.

– Toskurin í vestaraparti av Eystrasalti hevur tað gott, satt at siga betri enn seinastu 10 árini. Tað er ikki rímiligt at seta í verk slíka avmarking við ongari sakligari grundgeving, sigur hann.

Samráðingar millum fiskimálaráðharrar í ES verða í Luksemburg um miðjan oktober.