Skúlabørn kring heimin í veðurlagsverkfalli

Børn kring allan heimin vilja, at heimsins stjórnir at seta tiltøk í verk, ið avmarka avleiðingarnar av veðurlagsbroytingunum

Fleiri milliónir skúlabørn eru í veðurlagsverkfalli í dag kring allan heimin. Her frá einum einum tiltaki, su mvar í London í fjør

Johnsigurd Johannesen

20.09.2019 - 09:42

Fleiri milliónir skúlabørn eru í verkfalli í dag kring allan heimin við kravi um, at heimsins stjórnir at seta tiltøk í verk, sum avmarka avleiðingarnar av veðurlagsbroytingunum.

Tað er ikki bara skúlanæmingar, sum eru í verkfalli, men starvsfólk í summum av heimsins størstu fyritøkum og hjálparfelagsskapum eru eisini við í tiltakinum, skriva tíðindastovurnar.

4.600 tiltøk á skránni

16 ára gamla Greta Thunberg úr Svøríki, sum er kend um allan heim fyri síni sjónarmið í veðurlagsmálum, tók stig til veðurlagsverkføllini í fjør. Tey vóru vanliga hvønn fríggjadag, eisini í Føroyum.

Hon er í løtuni á veðurlagsfundi í USA, har ungfólk um vikuskiftið fara at skifta orð um veðurlagsmál. Fundurin er á ST-høvuðsborgini í New York upp undir ST-aðalfundin, sum byrjar í næstu viku.

Greta Thunberg sigur, at meira enn 4.600 tiltøk eru á skránni ymsa staðni í heiminum í dag.