Vónar at fáa friðaravtalu í lag við Taliban

Amerikanski verjumálaráðharrin, Mark Esper, kom í gjár til Afganistan í eini roynd at fáa Taliban til samráðingarborðið

Amerikanskir hermenn bjóða amerikanska verjumálaráðharranum, Mark Esper, vælkomnum tá hann kom til afganistan í gjár

Mynd: AP

21.10.2019 - 08:04

– Endamálið er, sum frálíður, at fáa friðaravtalu í lag - eina politiska avtalu, sigur Mark Esper, amerikanskur verjumálaráðharri, sambært Reuters.

Taliban hevur valdið á størri parti av Afganistan nú, enn í 2001, tá hernaðarliga samgongan, sum USA stóð á odda fyri, rak Taliban frá.

Donald Trump sleit friðarsamráðingarnar við Taliban í september eftir eina røð av blóðigum atsóknum, hóast framstig vórðu gjørd við samráðingarborðið.

65-70 fólk deyð í atsókn

4.300 fólk eru annaðhvørt deyð ella særd í krígnum móti Taliban seinastu mánaðirnar, vísa tøl hjá Sameindum tjóðum.

Í gjár vitjaði afganski forsetin, Ashraf Ghani, eina bygd, har 65 til 70 fólk doyðu, tá søkt varð at einari mosku. Eingin hevur átikið sær skyldina fyri atsóknina.

Í løtuni er óvist, um Ghani varðveitir forsetasessin. Eftir seinna valumfar siga bæði hann og avbjóðarin, Abdullah Abdullah, at teir hava vunnið. Valnevndin hevur fleiri ferðir útsett at kunngera valúrslitið.