Uppskot um at leggja saman við Grønlandsbankan

Uppskotið um, at leggja BankNordik saman við Grønlandsbankan, verður tó neyvan samtykt, tí nevnd bankans tekur ikki undir við tí.

Kim Pedersen, partaeigari, mælir til, at nevndin í BankNordik fyri komandi ársaðalfund bankans setur seg í samband við nevndina í Grønlandsbankanum.

Nevndin tekur ikki undir við uppskotinum

Tað verður gjørt fyri at kanna, um grundarlag er fyri samanlegging ella øðrum sínámillum bindandi samstarvi millum BankNordik og Grønlandsbankan.

Nevndin svarar, at eitt slíkt strategiskt stig hoyrir undir virkisøki og ábyrgdarøki nevndarinnar. Nevndin tekur ikki undir við uppskotinum hjá Kim Pedersen.

Nevndin í BankNordik tekur heldur ikki undir við einum uppskoti hjá Kim Pedersen um, at bankin keypir egin partabrøv í staðin fyri at luta út vinningsbýti.  

Ikki lógarheimild at keypa egin partabrøv

Nevndin sigur, at BankNordik hevur ikki lógarheimild til at keypa egin partabrøv, uttan at Fíggjareftirlitið hevur givið loyvi til tess.

Nevndin vísir eisini til lóggávuna á økinum. Sambært henni hevur bankin ikki heimild til ella møguleika fyri at brúka upphæddina, sum er í uppskoti at gjalda sum vinningsbýti fyri 2019, til at keypa egin partabrøv fyri árslok 2020. 

Annars fekk nevndin á aðalfundinum í fjør loyvi til at keypa egin partabrøv. Loyvið er galdandi til 1. mars 2024. BankNordik ætlar at lata 67,2 milliónir í vinningsbýti fyri 2019, sjey krónur fyri partabrævið.