Ógreitt hvør skal gjalda forskúla í frískúlum

Mentamálaráðið eigur at tosa við Kommunufelagið um forskúlarnar í frískúlunum, tí óvist er, hvør skal gjalda teir, landið ella kommunurnar.

Eitt uppskot er í tinginum um, at kommunurnar gjalda allan raksturin hjá forskúlaflokkum í frískúlum. 

Mentanarnevndin hjá løgtinginum hevur viðgjørt málið.

Tosa við Kommunufelagið

Minnilutin, sum er samgongan í hesum førinum, mælir til at samtykkja uppskotið. Men við teirri viðmerking, at landið og kommunurnar eru ikki samd, um forskúli er eitt skúlatilboð ella eitt dagstovnatilboð.Tey eru tí heldur ikki samd um, hvør skal gjalda raksturin.

Tí mælir minnilutin landsstýrismanninum í mentamálum til at tosa við Kommunufelagið um hetta.

Hava onga ávirkan

Meirilutin í Mentanarnevndin, andstøðan, heldur, at landið skal ikki áleggja kommunum útreiðslur fyri tilboð, sum kommunan onga ávirkan hevur á. Frískúlarnir eru privatir, tí hava kommunurnar onga ávirka á teir. 

Meirilutin tekur ikki undir við uppskotinum. Hann vísir á, at Kommunufelagið bað landsstýrismannin taka uppskotið aftur.