Tryggingarfeløg í ES sleppa at tryggja í Føroyum

Landsstýrið vil hava lógina um tryggingarvirksemi broytta, so tryggingarfeløg í ES-londum og EBS-londum sleppa at skrokktryggja og ábyrgdartryggja flogfør í Føroyum, ábyrgdartryggja skip, sum eru í minsta lagi 300 bruttotons, og ábyrgdartryggja flogvøllir.

Í dag hava Føroyar avtalur við Ísland og Danmark um felags tryggingarmarknað.

Men tryggingarfeløg í londum, sum Føroyar ikki hava avtalur við, hava teknað tryggingar í Føroyum.

Sertryggingar

Tryggingareftirlitið sigur, at nógvar sertryggingar, millum annað lógarkravdar tryggingar, verða teknaðar í útlendskum tryggingarfeløgum.

Tryggingareftirlitið heldur, at hetta í høvuðsheitum skyldast, at føroysk, íslendsk ella donsk tryggingarfeløg, sum lógliga kunnu reka virksemi í Føroyum, ikki bjóða hesar sertryggingar.

Nú er ætlanin at broyta lógina, so tryggingartørvurin í Føroyum kann nøktast lógliga.