Jákup Sverri farin fyrsta rannsóknartúrin

Í morgun fór Jákup Sverri fyrsta rannsóknartúrin fyri Havstovuna.

Á fyrsta túrinum er endamálið at kanna brisling í Tangafirði og á Skálafjørðinum.

Hetta er triðja árið, at Havstovan ger brislingakanningar á føroysku firðunum.

Hóast Jákup Sverri var nógv seinkaður, hevur Havstovan ætlað, at hann skuldi gera fyrstu rannsóknirnar jól, og tað verður gjørt nú.

Tikið útgerð

Skipið varð latið Fiskimálaráðnum 3. desember, og síðani hevur Jákup Sverri ligið á Havnini og tikið útgerð.

Ósemja var millum Sjóvinnustýrið og Fiskimálaráðið um, hvussu Jákup Sverri skuldi skrásetast. Sjóvinnustýrið skrásetti skipið sum handilsskip síðst í oktober, men Fiskimálaráðið vildi hava Jákup Sverra skrásettan sum fiskiskip.

Endin var, at Jákup Sverri verður verandi skrásettur sum handilsskip, men ein fyrisitingarlig avgerð loyvir fiskimonnum at mynstra umborð.