Fluttar kvotur ikki takast við í veiðigjaldið

Fíggjarmálaráðið mælir tinginum frá at taka makrelin, sum verður fluttur til næsta ár, við í veiðigjaldið næsta ár.

Í stuttum telduposti til Fíggjarnevndina sigur Fíggjarmálaráðið, at tað hevur somu veiðigjøld í uppskotinum um fíggjarlóg fyri næsta ár, sum eru í fíggjarlógini fyri 2020.

Óvissan um kvoturnar næsta ár ger tað ógjørligt at hava onnur veiðigjøld enn tey, sum eru í ár. 

Framflyting av 20.000 tonsum av makreli kunnu hava við sær størri inntøkur í 2021.

Men tað hevur ikki eydnast at fiska alla makrelkvotuna í ár, og sama óvissa er helst eisini galdandi fyri 2021. Tí verður mælt frá at taka fluttu kvoturnar við í dagførdu inntøkumetingina, sigur Fíggjarmálaráðið.

260 mió. kr.

Metta veiðigjaldið í ár er 260 mió. kr.

Veiðigjøldini eru 1,50 kr. fyri kilo av makreli, 60 oyru fyri norðhavssild, 25 oyru fyri svartkjaft og 50 oyru fyri kilo av botnfiski í Barentshavinum. Hetta eru somu gjøldini, sum hava verið síðani 2018.

Heimaflotin er undantikin veiðigjald eins og undanfarin ár.

Ein arbeiðsbólkur ger í løtuni uppskot um nýtt tilfeingisgjald.