Handilsjavnin fyri vørur minkaði 1,1 milliard

Føroyski handilsjavnin fyri vørur minkaði eina komma eina milliard krónur í fjør, skrivar Vinnuhúsið á heimasiðuni. Orsøkin er størri nýtsla í Føroyum og minni útflutningsvirði.

Innflutningurin stóð næstan í stað sammett við 2019. Innflutningurin til beinleiðis nýtslu var tó 11 prosent størri í 2020 enn í 2019.

Sambært Hagstovuni, sum Vinnuhúsið hevur tølini frá í sínum samandrátti, vórðu serliga nógv innbúgv og nógvar hvítvørur innfluttar í fjør.

Bara makrelur størri útflutningsvirði

Hóast oljuinnflutningurin vaks 10 prosent, gjørdi lági prísurin, at brennievnið kostaði fjórðingin minni í fjør enn í 2019.

Tonsatalið á fiski, sum varð útflutt, var á leið tað sama sum í 2019, men virðið minkaði nógv, 1,2 milliardir krónur.

Bara makrelur hevði størri útflutningsvirði í fjør enn í 2019, vísir samandrátturin hjá Vinnuhúsinum. Virðið var tvey prosent størri, men nøgdin var 12 prosent størri.