Fólk í Sandoy og Suðuroy eta oftast grind

Býrt tú í Sandoynni ella í Suðuroynni, so eru nógv størri sannlíkindi fyri at tú etur grind regluliga, enn um tú býrt í høvuðsstaðnum. Tað er ein av niðurstøðunum í nýggjari kanning, Fólkaheilsuráðið hevur gjørt.

Í Sandoy og Suðuroy siga 31 prosent av teimum spurdu, at tey eta grind minst einaferð um mánaðin. Hinvegin, so siga bara seks prosent av teimum spurdu í Havn, at tey eta grind minst einaferð um mánaðin.

Í Vágoy er talið 17,1 prosent, í Eysturoy er talið 9,7 prosent og í Norðoyggjum siga 8,9 prosent av teimum spurdu í kanningini um matvanar, at tey eta grind minst einaferð um mánaðin.

Næstan ein triðingur, 32,3 prosent, av teimum spurdu siga, at tey sjáldan ella ongantíð eta grind. Tilsamans 2.750 fólk svaraðu spurninginum hjá Fólkaheilsuráðnum um, hvussu ofta tey eta grind.