Meistarar: Lóg um elinnlegging er PR-stunt

Handverksmeistarafelagið fýlist á, at nýggja uppskotið um løgtingslóg um at løggilda elinnleggjarafyritøkur ikki er sent til hoyringar av nýggjum. 

Nógvar broytingar eru gjørdar í uppskotinum. Og málið átti tí at verið kannað nærri og betur lýst, siga handverksmeistarar.

Felagið hjá teimum spyr, hví kravið um fastan bústað í Føroyum er strikað.

Felagið sigur eisini, at fólk skulu vera útbúgvin elektrikari fyri at kunna gerast elinnstallatørur.

PR-stunt

Handverksmeistarafelagið kallar tað eitt PR-stunt at kalla frítíðarløggildingar fyri hjávinnuløggildingar.

Tað er bæði ótrygt og kappingaravlagandi at geva hjávinnuelinnleggjarum linari krøv, heldur Handverksmeistarafelagið.

Felagið sigur bart út, at endamálið er vist, at útisiglarar skulu sleppa at gera elinstallatiónir, meðan teir eru heima.

Hjávinnuelinnleggjarar hava fulltíðarstarv aðrastaðni og hava ikki útreiðslurnar, sum vinnurekandi hava, sigur Handverksmeistarafelagið.