Javnt undan triðju finalunum

Tað einasta, sum er heilt víst undan triðju FM-finalunum í hondbólti í dag, er, at føroyameistaraheitið ikki verður avgjørt.

Bæði hjá kvinnum og monnum er javnleikur 1-1 eftir tær fyrstu tvær finalurnar, og tí tað skal spælast upp í trý, kann einki lið gerast FM-vinnari í dag.

Neistin og StÍF bresta saman í høllini á Hálsi. Har vann StÍF fyrstu finaluna, men uttan Haruka Gima, taptu strandingar á heimavølli við einum máli mikukvøldið. Óvist er, um japanski stórspælarin verður at síggja á vøllinum í dag.

VÍF tekur ímóti H71 i høllini í Vestmanna. Har vunnu vestmenningar sannførandi í fyrsta dystinum millum liðini, men mikukvøldið vunnu hoyvíkingar upp á brotskastskapping eftir ein sera dramatiskan dyst.

VÍF og H71 spæla klokkan 16.00. Kringvarpið vísir dystin beinleiðis í sjónvarpinum. Dysturin millum Neistan og StÍF byrjar klokkan 19.00.