94 mió. kr. í avlopi í fyrsta ársfjórðingi

BankNordik hevði 94 milliónir krónur í avlopi eftir skatt í fyrsta ársfjórðingi í ár. Og tað er gott, sigur bankin í tíðindaskrivi. Fyri skatt var úrslitið 118 milliónir krónur. Í fjør var tað úrslitið 30 milliónir krónur í tapi.

Útlitini fyri 2021 eru góð, hóast ein ávís óvissa framvegis valdar, sigur bankin. Bankin væntar, at nettoúrslitið í ár verður millum 150 og 200 milliónir krónur.

Tann 1. februar varð danska virksemið hjá BankNordik selt Spar Nord, og væntandi verða donsku viðskiftafólkini endaliga flutt til Spar Nord í juni.

Útlánini hjá BankNordik vuksu 100 milliónir, og innlánini stóðu í stað. Solvensurin hjá BankNordik, sum var 23,4 prosent í fyrsta ársfjóðingi í fjør, fór upp í 36,2 prosent í ár.