Ov stuttir ímóti russisku bjørnini

Tá munurin bert var eitt mál í hálvleikinum í dystinum á Hálsi ímóti Russlandi, mundu fleiri vænta og vóna, at føroyska hondbóltslandsliðið kundi endurtaka bragdið frá fríggjadegnum, tá søguligur sigur kom til høldar móti Kekkia.

Avrikini í seinna hálvleiki í fleiri av undanfarnu dystunum - eisini honum móti Kekkia - hava verið sera góð, og tí var útgangsstøðið gott eftir steðgin.

Men tað gekk ikki eftir vild hesaferð. Russarar vóru klárt við yvirlutan frá byrjan í seinna hálvleiki, og leiðslan upp á fýra mál, sum teir uppbygdu sær hesa fyrstu løtuna í seinna hálvleiki, helt dystin út.

Góð byrjan

Føroyska verjan og málverjin, Nicholas Satchwell, stóðu væl, og russarar høvdu ilt við at skora. Føroyar skoraðu heldur ikki nógv, men nóg mikið til at fylgja útiliðnum.

Tað var aftur stjørnuskotið úr IK Sävehof, Elias á Skipagøtu, sum tók ábyrgd í álopsspælinum, og tað var eisini hann, sum minkaði til hálvleiksstøðuna, 11-12 við frekum brotskasti.

Megnaðu ikki at fylgja við

Útiliðið, sum vann bólkin, spældi væl í seinna hálvleiki. Russisku spælararnir høvdu lutfalsliga lætt við at koma til møguleikar og mál, meðan føroyska liðið, sum kanska varð merkt av tøttu dystarskránni, hevði stórar trupulleikar at skjóta framvið stóru verjuspælarunum og málverjunum, sum tóku fleiri skot.

Føroyar høvdu kjansisn at minka um russiska leiðsluna til tvey mál seint í dystinum, men bæði avgerðir og aktiónir tóktust vera merktar av møði, og so revsaðu russarar, sum hava spælt seg til EM-endaspælið.

Føroyar - Russland (høllin á Hálsi)
23-28 (11-12)