Korona staðfest við kanning fjórða dag

Ein nýggjur koronusmittutilburður varð staðfestur í gjár. Tað vísa nýggjastu tølini hjá landslæknanum. Viðkomandi hevur verið uttanlands, og smittan bleiv staðfest við kanningini fjórða dag.

484 kanningar vórðu gjørdar seinasta samdøgrið, og allar kanningarnar eru liðugt greinaðar. Tilsamans eru nú gjørdar nærum 260.000 kanningar.

670 fólk hava fingið staðfest smittuna í Føroyum. 663 fólk eru nú staðfestir frísk aftur. Higartil er eitt fólk deytt við koronu í Føroyum. Í løtuni eru seks fólk smittað.