Stórur áhugi í Danmark fyri dystinum móti Føroyum

Áhugin fyri danska landsliðnum er nógv øktur eftir góða EM-endaspælið, og tí væntar danska fótbóltssambandið, DBU, at tað verður útselt til næstu landsdystirnar hjá Danmark, eisini dystin móti Føroyum á Tórsvølli. 

Men DBU fekk einans 600 atgongumerkir at selja donsku fjepparunum, og tey eru longu seld. 

"Vit kundu selt 10.000 atgongumerkir til dystin móti Danmark bara til føroyingar, men tíverri so hava vit einans 5.000 sitipláss," sigur Kristin Dam Ziska frá FSF við TV3 Sport. 

Dammark skal eisini spæla móti Skotlandi og Ísrael á heimavølli í heyst. 

"Vit vildu gjarna bjóðað fleiri donskum fjepparum til dystin, men tað er eisini ein stór uppliving hjá føroyingum at síggja danska landsliðið. Ta upplivingina vilja vit gjarna geva teimum. Føroyingar fylgdu væl við Danmark í Euro 2020 á sama hátt, sum føroyingar fylgdu væl við Íslandi í Euro 2016," sigur Kristin Dam Ziska.