121 fólk smittað við korona

Talið av smittaðum í Føroyum er sera høgt. Við fyribilstølunum frá kanningunum í gjár er talið av smittaðum nú 121 fólk, og áleið 480 fólk eru í sóttarhaldi. 

Lars Fodgaard Møller sigur við Kringvarpið í dag, at tamarhald er á støðuni, men hann heitir á fólk, um at lata seg kanna annan dagin eftir komu til Føroya, eins og myndugleikarnir hava heitt á fólk um at gera. 

Landslæknin sigur, at tey í Landslæknaembætinum hava upplivað seinastu tíðina, tá ið tey ringja til fólk, sum eru komin til Føroya, at fá teirra hava latið seg kannað annan dagin eftir komu. Tí heitir hann á fólk, um at minnast til at lata seg kanna. 

Bárður á Steig Nielsen, løgmaður, sigur í viðmerking í dag, at ongar ætlanir eru um at broyta koronutilmælini, hóast høga smittutalið. 

Hoyr meira í tíðindunum klokkan 14.00

Greinin er rættað: Tá greinin var skrivað var hon bygd á fyribilstøl frá landslæknanum. Almennu tølini eru, at 7 tilburðir vóru í gjár, og samlaða talið av smittaðum er nú 121 fólk. Samstundis eru fleiri leyslatin úr sóttarhaldinum, so nú eru 482 fólk í sóttarhaldi til samans, eftir at almennu tølini eru dagførd.