Grønland: Fleiri enn 600 eru smittað

Eisini í Grønlandi breiðir koronusmittan seg, og tað hevur fingið myndugleikarnar at herða tiltøkini. Broytingarnar komu í gildi í morgun.

Í løtuni eru 604 fólk sjúk, og tað er fyrstu ferð, at fleiri enn 600 fólk hava koronu í Grønlandi, skrivar Ritzau.

Eitt av krøvunum er, at bert helvtina av teimum, sum kunnu vitja matstøð og skeinkistøð samstundis, sleppa inn. Og øll, sum eru yvir 12 ár, skulu vísa koronupass.

Tey, sum verða staðfest positiv, fáa í framtíðini eitt sms, tá tey eru staðfest sjúk, og skulu ikki bíða efti úrslitinum av kanningini.

Longd til 5. apríl

Av tí sama kunnu fólk skjótari fara í sóttarhald, sigur Múte B. Egede, landsstýrisformaður.

Tiltøkini, sum vóru sett í gildi í desember, verða longd til 5. apríl, men eru nú bert galdandi fyri pláss, har sjúkan breiðir seg.

Talan er um koronupass og masku, sum fólk í teimum økjunum skulu hava.

Í løtuni eru 1205 fólk í Føroyum smittað, og trý eru innløgd.