European Cup lutakastið hjá H71 í morgin

Fyrrapartin í morgin fáa hondbóltskvinnurnar hjá H71 at vita, hvørjum tær skulu spæla ímóti í fjórðingsfinalunum í sokallaðu EHF European Cup.

Lutakast verður um bæði fjórðings- og hálvfinalur í Wien í morgin klokkan 10.00.

Í fjórðingsfinalunum verða øll átta liðini, sum eftir eru í kappingini, latin í ein pott. Eingin styrkismeting er og lið úr sama landi kunnu eisini hittast.

Fyrru fjórðingsfinalurnar verða spældar 12. ella 13. februar, og seinnu dystirnir vera vikuskiftið eftir.

Annar av venjarunum hjá H71, Ingi Olsen, er fleiri ferðir spurdur um, hvørjum hann helst vil møta í fjórðingsfinalunum.

Hann ynskir sær ÍBV; tað er ikki so løgið, tí dótturin, Ingibjørg Olsen, spælir við liðnum í Vestmannaoyggjunum. 

Liðini í fjórðingsfinalunum eru hesi:

Costa del Sol Malaga (Spania)
Rocasa Gran Canaria (Spania)
Visitelche.com Bm Elche (Spania)
H71 (Føroyar)
IBV Vestmannaeyjar (Ísland)
ZRK Bekament Bukovicka Banja (Serbia)
HC DAC Dunajská Streda (Slovakia)
HC Galychanka Lviv (Ukraina)