Talibani í afganska ferðalagnum meldaður í Noregi

Anas Haqqani, ein av teimum 15 taliban-limunum, sum eru komnir á diplomatiska vitjan í Noregi, er meldaður til løgregluna.

Tað er norsk-afganski Zahir Athari, sum hevur meldað.

- Vit hava meldað hann fyri krígsbrotsverk og brot á mannaættina, sigur Zahir Athari við NRK.

Herleiðari

27 ára gamli, Anas Haqqani, er afganskur hernaðarleiðari og ein av teimum í leiðsluni í Haqqani-netverkinum, sum er partur av Taliban. 

- Anas Haqqani er ein av monnunum aftan fyri nøkur av teimum ógvisligastu álopunum á afganska fólkið síðani 2001, har fleiri eru deyð. Tað ger ilt hjartað, at hann kemur sum ein høgt virdur gestur til Noregs. Hann skuldi í staðin verði lagdur í handjørn og fluttur til mannarættindadómstólin í Haag, sigur Athari við norskar miðlar.

Flestu lond í heiminum hava ongantíð góðtikið Taliban sum veruligu stjórnina í Afganistan.

Danmarks Radio skrivar, at Anas Haqqani er bróðir Sirajuddin Haqqani, sum er næstovasti í Taliban.

Haqqani-netverkið verður framvegis roknað sum ein yvirgangsfelagsskapur av USA, og Sirajuddin Haqqani er framvegis eftirlýstur av FBI fyri eitt álop í 2008.

Finnast at Støre

Norski forsætisráðharrin Jonas Gahr Støre hevur fingið sera nógvar atfinningar, nú umboð fyri afgansku stjórnina eru komin til Noregs at fundast.

- Eg skilji, at atfinningar koma. Talan er um eina rørslu, sum hevur heilt onnur virði enn tey, vit hava. Men vit mugu arbeiða soleiðis sum støðan er í heiminum, segði Jonas Gahr Støre við NRK í gjárkvøldið.

Hann vísir á, at Afganistan nærkast eini menniskjansligari kreppu. Fleiri millliónir børn eru í vandi fyri at doyggja í hungri, og næstan 90 prosent av fólkinum hava tørv á hjálp.

Jonas Gahr Støre er á fundi í ST-trygdarráðnum í New York, og hittir tí ikki Taliban í Noregi.

Fleiri norðmenn eru eisini sera argir um, at norski staturin hevur goldið  næstan sjey milliónir norskar krónur fyri at fáa eitt privatflogfar at flúgva talibanararnar til Noregs.