Koronuátøk: Grønland slakar ikki

Meðan Føroyar í næstum slaka í koronuátøkunum, og Danmark væntandi fer at boða frá tí sama í dag, heldur Grønland fast.

Í gjár boðaði Pele Broberg, landsstýrismaður í vinnumálum frá, at tey halda fast við koronuavmarkingarnar, og í onkrum førum herða tey eisini átøkini.

Nú verður kravt, at fólk hava munnbind og koronupass í øllum Grønlandi. Haraftrat sleppur ongin, sum er eldri enn 15 ár, inn í almenn støð, t.d. skeinkistøð, biografar og venjingarmiðstøðir uttan koronupass og munnbind.

Hetta er galdandi fyri øll 15 ár og eldri, uttan so, at tey skulu arbeiða á staðnum.

Eisini undantøk

Nøkur undantøk eru tó, eitt nú handlar, flogvøllir og avgreiðslur hjá almennum myndugleikum.

Frammaundan hava koronuavmarkingarnar í Grønlandi bert verið galdandi í støðum við ókendum smittuketum.

Nýggju avmarkingarnar kom í gildi í dag, og tær verða galdandi til 14. februar.

Eftir at smittutølini vóru millum 600-700 um dagin, vóru fyrradagin 214 nýggir tilburðir. 15 fólk eru innløgd við koronu í Grønlandi.