Strandarlondini samráðast aftur um uppsjóvarfiskin

Í næstu viku fara strandarlondini aftur at royna at fáa semju um, hvussu uppsjóvarfiskurin skal býtast millum londini í ár.

Tey hava fundirnar í Keypmannahavn.

Londini eru samd um, hvussu nógv kann fiskast.

Taka undir við ICES

Eftir samráðingar í London í tvær vikur í desember blivu Føroyar, Bretland, ES, Grønland, Ísland, Noreg og Russland samd um, at í mesta lagi 752.736 tons av svartkjafti, 598.588 tons av norðhavssild og 794.920 tons av makreli kunnu fiskast í 2022.

Hetta er tað sama, sum ICES mælir til.

Men ósemjan er um, hvussu nógv hvørt landið eigur. Ta ósemjuna fara londini at royna at loysa í Keypmannahavn í næstu viku. 

Vísindaligir bólkar

Føroyar hava formansskapin í samráðingunum um svartkjaft.

Strandarlondini eru eisini samd um at seta vísindaligar bólkar at savna alt taltilfar um havrannsóknir og fiskiskap viðvíkjandi makreli og svartkjafti, eins og longu verður gjørt viðvíkjandi norðhavssildini.