Russland fer at royndarskjóta rakettir, sum kunnu bera kjarnorkubumbur

(yvirskrift redigerað eftir tíðindini kl 18) 

NRK skrivar, at í venjingini, sum eitur GORM 2022, og er samansett venjing, skulu m.a. kavbátar í Barentshavinum skjóta upp rakettir móti málum í Chukotka í eystur Russlandi, og kavbátar í Kyrrahavinum skulu skjóta móti málum í Barentshavinum. Hvør rakett kann í eini krígsstøðu bera 10 kjarnorkubumbur, og hvør kavbátur kann hava 16 bumbur.

Greitt politiskt tekin

Ståle Ulriksen, granskari á Sjókrígsskúlanum, sigur við NRK, at tað er ikki av tilvild, at russiska venjingin er júst nú.

- Dagurin er strategiskt valdur. Tey gera hetta fyri at minna heimin á, at Russland hevur sterka kjarnorku, og at landið ikki bara hevur herdeildirnar sum eru kring Ukraina, sigur hann. Ulriksen er vísur í, at venjingin er greitt politiskt tekin til Noreg. 

Hann sigur, at fyrr lendu rakettirnar nógv longri eystri í Barentshavinum, men nú er skotvenjingin flutt óvanliga langt vestureftir fyri hetta slagið av venjingum.

Vandaøki

Norska sjóverjan hevur nú lýst eitt øki í Barentshavinum fyri vandaøki, men sigur, at tað kortini ikki er ólógligt at fara inn í økið, skrivar NRK.