Chelsea til sølu: Roman Abramovich tekur seg úr Onglandi

Russiski eigarin hjá Chelsea, Roman Abramovich, hevur sett Premier League-felagið til sølu, skrivar The Guardian og aðrir enskir miðlar.

Roman Abarmovic hevur átt Chelsea síðan 2003.

Hildið verður, at sveisiski milliardingurin, Hansjörg Wyss, hevur ætlanir um at keypa London-felagið. Eisini eitt amerikanskt samtakt sigst vera áhugað.

Síðstu dagarnar hava røddir verið frammi í enska tinginum, sum hava spurt eftir møguligum revsitiltøkum ímóti Roman Abramovich. Chris Bryant, sum er tinglimur fyri Labour, sigur, at 55 ára gamli Roman Abramovich er farin undir at selja sínar ognir í Bretlandi fyri at sleppa undan fíggjarligum revsitiltøkum.

Tí verður hildið, at ein møgulig søla av Chelsea fer at ganga skjótt fyri seg. Stórfelagið í vesturlondon vil ikki gera viðmerkingar.

Roman Abramovich hevur annars noktað fyri, at hann hevur tætt samband við russiska forsetan Vladimir Putin ella russiska statin.