Fíggjarnevndin vil játta meira til Fámjinstunnilin

Øll fíggjarnevndin tekur undir við uppskotinum frá landsstýrinum um at hækka játtanina til Fámjinstunnilin 38 milliónir kr.

Løgtingið samtykti upprunaliga at játta 169 milliónir til verkætlanina, men nú verður mett, at hon fer at kosta 207 milliónir kr.

Landsverk sigur, at tey høvdu væntað, at tilboðini fóru at vera lægri, enn tey vóru. Haraftrat kemur serligi váðin í jarðfrøðiligu viðurskiftunum, har tunnilin skal borast, og útlitini fyri hækkandi prísum, sum eru orsøkin til, at neyðugt er at hækka upphæddina í verklagslógini.

Klárt er at fara undir Fámjinstunnilin, og gongst um ætlað, verður nýggja farleiðin liðug á sumri í 2024.

Uppskotið kemur til aðru viðgerð í løgtinginum í morgin, og tá verður eisini atkvøtt í málinum.