Kanna hví fólk ikki fáa hjálp á læknavaktini

Nú verður kannað, hví fólk, sum hava sálarligar trupulleikar, ikki fáa hjálp, tá tey fara til læknavaktina í Landssjúkrahúsinum.

Landssjúkrahúsið og Heilsutrygd kanna hetta.

Og Kaj Leo Holm Johannesen, landsstýrismaður, hevur biðið um eina frágreiðing.

Eyðgunn Samuelsen, løgtingskvinna, spurdi, hví fólk, sum venda sær til Heilsuverkið við bráðfeingistørvi á sálarhjálp, verða send heim, uttan at røttu fakfólkini kanna tey.

Vend í durunum

Hon sigur, at fólk, sum koma á Bráðdeildina, verða vend í durunum við grundgevingini, at Psykiatriski depilin ikki tekur fólk inn. 

Kaj Leo Holm Johannesen sigur, at pengar eru settir av í fíggjarlógini, so arbeiðið at gera eina bráðfeingissálarhjálp kann byrja.
 
Ætlanin er at førleikamenna starvsfólk á Psykiatriska deplinum til at røkja bráðfeingis sálarhjálp, sum kann knýtast at  læknavaktini 1870.