Ukraina: Fyrsta málið um krígsbrotsverk byrjað

Í dag byrjar fyrsta rættarmálið um krígsbrotsverk í Ukraina, síðani russiska innrásin byrjaði.

Ein 21 ára gamal russiskur hermaður, Vadima Sjisjimarina, er ákærdur fyri at hava dripið ein 62 ára gamlan ukraina í landnyrðingspartinum av Ukraina tann 28. februar.

Myndugleikarnir í Ukraina siga, at ungi maðurin samstarvar við kanningarfólkini, og at hann hevur viðgingið tað, sum fór fram í Ukraina fyrstu dagarnar eftir innrásina.

Kann fáa fongsulsrevsing fyri lívið

Sakarmálið er í høvuðsstaðnum, Kyiv, og maðurin er ákærdur fyri krígsbrotsverk og dráp.

Verður hann funnin sekur, kann hann vænta fongsulsrevsing fyri lívið.

Sakarmálið er tað fyrsta av sínum slagi í Ukraina, og onnur mál um krígsbrotsverk eru á veg, upplýsa myndugleikarnir í Ukraina.