Limur í kanningarnevndini: Trump royndi at falsa valúrslitið

Sjónvarpaðu avhoyringarnar í sambandi við kanningarnar av álopinum á Capitol Hill í Washington 6. januar í fjør, fara hesa vikuna at avdúka prógv fyri, at fyrrverandi amerikanski forsetin, Donald Trump, var við í royndini at falsa valúrslitið á forsetavalinum í 2020.

Tað sigur ein limur í kanningarnevndini við amerikanska miðilin CNN.

Sambært Adam Schiff, sum er demokratiskur kongresslimur og limur í kanningarnevndini hjá Umboðmannatinginum, fer nevndin at leggja fram prógv um, at fyrrverandi forsetin var uppi í miseydnaðu royndini at falsa atkvøður hjá valfólki, so at Biden skuldi tapa forsetavalið.

Amerikanska løgmálaráðið kannar eisini spurningin um falsaðar atkvøður, sum viðhaldsfólk hjá Trump í statunum Arisona, Georgia, Michigan, New Mexico, Nevada, Pennsylvania og Wisconsin hava savnað inn.

Biden vann allar hesa statir, sigur CNN, sambært Reuters.