Bara heilsufakfólk skulu fremja vakurleikaskurðviðgerðir í Norðurlondum

- Vakurleikaskurðviðgerðir verða framdar fleiri staðni í Norðurlondum, uttan at rætti heilsufakligi førleikin ger skurðviðgerðina, og tað kann vera vandamikið fyri sjúklingin. Tí skal hetta steðgast, sigur Eva Lindh, forkvinna í norðurlendsku vælferðarnevndini.

Nevndin mælir til at kanna og samskipa reglur og lógir fyri vakurleika-innspræningar og onnur kirurgisk inntriv, so at bara fakfólk á heilsuøkinum kunnu gera hesar skurðviðgerðir. Endamálið er at tryggja sjúklingar.

Uppskotið varð samtykt á norðurlandaráðsfundi fyri vælferð mikudagin.

Ymisk lóggáva

Lóggávan fyri vakurleikaskurðviðgerðir er ymisk í Norðurlondum. Og í fleiri Norðurlondum hava myndugleikarnir ikki eftirlit við, hvør ger hesar skurðviðgerðir, skrivar norden.org.

Í Finnlandi fæst botox bara við resept, og læknar ella heilsustarvsfólk við serligum førleikum skulu spræna tað inn, men aðrar heilsuskurðviðgerðir krevja ikki somu førleikar.

Í Svøríki hava myndugleikarnir nýliga sett krøv um, at vakurleikaviðgerðir skulu skrásetast, og bara læknar, tannlækar og sjúkrarøktarfrøðingar við serligum loyvi kunnu gera tað. 

Í Noregi eru linari krøv. Har kunnu starvsfólk, sum hoyra til ein fakbólk á heilsuøkinum, geva innspræning.

Hvussu tað er í Føroyum, er óvist, tí tað hevur ikki eydnast at fáa viðmerking frá Kaj Leo Holm Johannesen, landsstýrismann í heilsumálum, ella frá Heilsumálaráðnum.