- Tíðindi, mentan og ítróttur
U20-landsliðið í eldin
Føroysk hondbólts- og ítróttarsøga verður skrivað á middegi í dag, tá ið føroyska U-20 landsliðið í manshondbólti spælir sín fyrsta dyst í einum endaspæli. Spælt verður móti Danmark, sum er millum fremstu hondbóltstjóðir í heiminum.
Føroyar eru komnar í sterkan bólk í EM-endaspælinum í Portugal. Hini liðini eru Slovenia og Ungarn.
Spælararnir á føroyska U-20 landsliðnum verða roknaðir at hoyra til besta árgangin í føroyskum hondbólti nakrantíð. Fleiri eru longu yrkisspælarar í útlondum, og spæla á føroyska A-landsliðnum. Nevnast kunnu Elias Ellefsen á Skipagøtu, Hákun West av Teigum, Pauli Jacobsen og Pauli Mittún.
Dysturin millum Føroyar og Danmark verður spældur í Porto, og byrjar á middegi klokkan 12.
Kringvarpið fer at vísa dystirnar hjá føroyska mansunglingalandsliðnum í Portugal í sjónvarpinum, og í dag verður byrjað at senda klokkan 11.50.