Fyrsti BA.2.75-smittutilburðurin staðfestur í Danmark

Tann fyrsti smittutilburðurin við illa smittandi koronuslagnum, BA.2.75, er nú staðfestur í Danmark.

Tað váttar Søren Alexandersen, fakligur leiðari hjá danska Serumsstovninum, sambært sjónvarpsstøðini, TV2.

Hann leggur áherðslu á, at Serumstovnurin ikki stúrir, og eingin grund er at halda, at fólk gerast sjúkari av BA.2.75 enn Omikron.

Tann smittaði er ein dani, sum hevur verið og ferðast í Suðurevropa, og tilburðurin varð staðfestur fyrradagin.

Koronuslagið hevur tikið dik á seg í India, har smittan hevur vakt ans, tí BA.2.75 smittar so illa.

12. juni vóru tvey prosent av smittutilburðunum í India við nýggja frábrigdinum, nú er tað talið komið uppá 23 prosent.

Smittan er eisini staðfest í Japan, Týsklandi, Stórabretlandi, Kanada, USA, Avstralia, Ný Sælandi, og nú eisini í Danmark.