Undirtøka fyri at loyva vakmyndatólum í náttarlívinum

Tað er undirtøka í politisku flokkunum fyri at loyva kommunum at seta upp vakmyndatól.

Løgmaður fer nú undir at gera eitt uppskot um lógarbroyting klárt. 

Uppskotið, sum skal geva kommunum heimild at yvirvaka náttarlívið, skal eftir ætlan leggjast fyri løgtingið í heyst.

Hetta sigur Bárður á Steig Nielsen, løgmaður, í stuttari viðmerking til Kringvarpið í dag. 

Uppskotið kemur í kjalarvørrinum av, at Tórshavnar kommuna, í sambandi við harðskapsmál í náttarlívinum fyrr í ár, boðaði frá, at kommunan ætlar at seta vakmyndatól upp í kommununi fyri at betra um trygdina hjá borgarum.

Dátueftirlitið vísti tá á, at kommunur ikki hava heimild í lóg at seta vakmyndatól upp.

Løgmaður fór tí at kanna um politisk undirtøka var fyri eini lógarbroyting í hesum sambandi. Og tað er tað eftir øllum at døma, nú løgmaður fer undir at gera eitt uppskot klárt.