Skulu boða frá fyri at sleppa undan at rinda eftirløn

Tá fólk koma til Føroya at arbeiða, er umráðandi hjá teimum at fáa við í setanarsáttmálan, hvussu leingi, tey skulu arbeiða her. Starvið skal vera tíðaravmarkað.

Tí annars sleppa tey ikki undan at gjalda eftirløn.

Hetta hevur Taks avgjørt, og ta avgerðina hevur Kærustovnurin staðfest.

Vildi sleppa undan at gjalda

Tann, sum kærdi avgerðina hjá Taks, søkti um at sleppa undan at rinda til føroyska eftirlønarskipan.

Í umsóknini verður upplýst, at starvið byrjaði 1.apríl 2020 og endaði 31.januar 2022.

Men Taks segði, at í setanarsáttmálanum er eingin endadagur. Tí er starvið ikki tíðaravmarkað, segði Taks. Og tí verður ikki givin frítøka.