Nýggi forsetin í Kolumbia tikin í eið

Í dag verður nýggi forsetin í Kolumbia, Gustavo Petro, tikin í eið.

Millum teirra, sum eru boðin við til hátíðarhaldið, er spanski kongurin, Felipe, og í minsta lagi níggju forsetar í suðuramerikanskum londum, skrivar Reuters.

62 ára gamli Petro er fyrrverandi borgarstjóri í høvuðsstaðnum Bogotá, og hann er fyrsti vinstrasinnaði forsetin í landinum.

Á seinna valumfari fekk hann 50,4 prosent av atkvøðunum. 

Veljararnir vóna, at Gustava Petro fer at seta sosialar og búskaparligar nýskipanir í verk, sum kunnu beina fyri nógva harðskapinum og ójavnanum í Kolumbia.