EM-landsliðini í darti tikin út

Dartlandsliðini hjá bæði kvinnum og monnum, sum skulu kappast um EM-heitið síðst í september, eru tikin út.

Landsliðið hjá kvinnum er hitt sama, sum var til norðurlandameistaraheitið fyrr í ár. Kristian Joensen, landsliðsvenjari, hevur úttikið møðgurnar, Beintu Joensen og Jónu Miðalberg úr KDF og Annfríð E. Jacobsen og Birthe Sikivat úr ávíkavist HDF og ADF.

Annfinn Allanson Hjaltalin hevur tikið út Jan Erik Fjallstein úr VDF, Una Árting og Jan McIntosh úr HDF og Niels Thomsen úr HDF, sum er komin inn fyri Jón Johansen úr VDF í mun til NM-landsliðið. Uni Árting og Jan McIntosh endaðu á triðja plássi í tvímansleiki til norðurlandameistaraheitið. 

Uni Árting rakti nógv best á Skála

Landsliðsúttøkan var í samband við fyrstu dartkappingina eftir summarsteðgin, sum var á Skála um vikuskiftið. Hjá monnum var støðið høgt, og Uni Árting var í flokki fyri seg. 

Hann vann 7-1 í finaluni ímóti Niels Thomsen.

Seks kvinnur kappaðust á Skála, har Birthe Sikivat og Beinta Joensen spældu seg í finaluna. Birthe Sikivat dróg longra stráið og vann spennandi dystin 4-3.