Ov dýrt at byggja diabetesmiðstøð oman á C-bygningin

Fíggjarnevndin hjá løgtinginum heldur, at ætlanin um at byggja Steno-miðstøð í Føroyum er ov dýr.

Landsstýrismaðurin í heilsumálum hevur biðið um loyvi at taka móti 121 milliónum krónum frá Novo Nordisk-grunninum.

Peningurin skal brúkast árini 2023 til og við 2032 til at fíggja rakstur og íløgur í samstarvinum um millum annað diabetes millum Novo Nordisk-grunnin og Heilsumálaráðið

Ætlanin er at byggja Steno-miðstøðina oman á verandi C-bygning á Landssjúkrahúsinum.

Tað fer at kosta ov nógv, heldur Fíggjarnevndin.

Tekur ikki fíggjarliga orku frá heilsuverkinum

Hon mælir til at finna bíligari staðseting, møguliga í H-bygninginum, og á tann hátt fáa fleiri pengar til viðgerð og gransking.

Fíggjarnevndin tekur annars einmælt undir við uppskotinum við teimum viðmerkingum, sum hon hevur.

Fíggjarnevndin sigur seg hava fingið at vita, at verkætlanin fer ikki taka fíggjarliga orku frá føroyska heilsuverkinum.

Og allar dátur vera verandi ogn hjá føroyingum, sigur Fíggjarnevndin. 

Fíggjarnevndin hevði bara einans fund um málið.