Hondbóltur: Føroyar vitja Ukraina í Týsklandi

Tað verður eitt føroyskt landslið uttan størsta spælaran, sum vitjar Ukraina í EM-undankappingardysti í kvøld.

Elias Ellefsen á Skipagøtu er skurðviðgjørdur fyri knæskaða, og IK Sävehof-spælskiparin verður neyvan aftur á vøllinum fyrrenn í februar næsta ár.

Hinvegin er systkinabarnið, 17 ára gamli Óli Mittún, sum síðan í summar eisini hevur spælt í gula og svørta Sävehof-búnanum, í A-landsliðshópinum fyri fyrstu ferð.

Ukrainar í útlegd

Ukrainska landsliðið mátti stinga í sekkin í mars, tá russiska innrásin í Ukraina byrjaði. Leiðin gekk til Týsklands, har meginparturin av spælarunum hava hildið til síðan.

Seinni fekk ukrainska hondbóltsfelagið HC Motor Zaporizhziha, ið, sum navnið eisini sigur, liggur í einum av stóru stríðsøkjunum í Ukraina, pláss í næstbestu týsku hondbóltsdeildini. Har skal felagið, sum er mannað við fleiri av spælarunum í ukrainska landsliðshópinum, spæla hetta kappingarárið.

Dysturin í kvøld verður eisini í Týsklandi. Spælt verður á heimavøllinum hjá týska liðnum TV Grosswallstadt, sum spælir í næstbestu týsku hondbóltsdeildini. 

Sætta ferðin

Føroyar og Ukraina hava spælt fimm dystir ímóti hvørjum øðrum síðan 2018, og føroysku landsliðsspælararnir máttu smílast, tá teir bláu og gulu aftur komu úr bollanum saman við Føroyum, tá lutakastið var í mars.

Hvørja ferð hava ukrainar vunnið, men tvær ferðir -  seinast á heimavølli fyri hálvum øðrum ári síðan - hevur bert eitt mál verið á muni. Dysturin í kvøld byrjar klokkan 19, og Kringvarpið sendir beinleiðis frá klokkan 18.50.

Føroyski hópurin: 

Málverjar:
Nicholas Satchwell, KA Akureyri (ISL)
Pauli Jacobsen, JS Cherbourg (FRA)

Útileikarar:
Leivur Mortensen, Ajax København (DK)
Rói Berg Hansen, HØJ (DK)
Peter Krogh, H71 (FO)
Tróndur Mikkelsen, Ryger Stavanger (NOR)
Jónas Gunnarson Djurhuus, Frederiksberg IF (DK)
Pauli Mittún, Kristiansand (NOR)
Óli Mittún, IK Sävehof (SV)
Kjartan Johansen, Bækkelaget (NOR)
Vilhelm Poulsen, Lemvig-Thyborøn (DK)
Hákun West av Teigum, Skanderborg-Århus (DK)
Allan Norðberg, KA Akureyri, (ÍSL)
Rókur Akralíð, Århus HC (DK)
Teis Horn Rasmussen, Follo HK, (NOR)
Helgi Hildarson Hoydal, Kristiansand (NOR)