Føroyskur landsliðsspælari til København Håndbold

Pernille Brandenborg skiftir úr Randers HK til København Håndbold.

Strikuspælarin á føroyska landsliðnum hevur tikið avleiðingarnar av húsaganginum í Randers HK og hevur leitað sær til høvuðsstaðarfelagið, sum liggur á 4. plássi í bestu donsku hondbóltsdeildini.

Saman við strikuspælaranum skiftir danski U20-landsliðsspælarin Anne Christine Bossen.
 
 - Eg eri sera glað um og errin yvir, at eg skal spæla við København Håndbold, tí eg havi altíð sæð felagið sum spennandi og professionelt. Eftir eina hendingaríka tíð í Randers HK eri eg glað fyri at fáa kjansin í hópinum beinanvegin. Eg gleði meg at fara í København-blusuna og seta fulla ferð á, sigur Pernille Brandenborg við kbhbold.dk.

 - Tað var ein 'no-brainer', tá vit fingu møguleikan at styrkja um liðið. Báðir spælararnir hava neyðuga stigið fyri at styrkja lið okkara longu nú, sigur venjarin hjá KH, Rasmus Overby.