Scandinavian Star: 29 fólk krevja endurgjald

29 fólk, sum komu frá vanlukkuni við ferjuni Scandinavian Star í 1990, vilja hava endurgjald frá danska Sjóvinnustýrinum.

Einkjan eftir mannin, sum leingi var skuldsettur fyri at hava sett eld á umborð á ferjuni, fær ikki endurgjald, skrivar Politiken.

Advokaturin hjá teimum 29 fólkunum sigur, at endurgjaldið er 450.000 kr. fyri hvønn, tilsamans góðar 13 milliónir kr., sum staturin má gjalda. Fara øll, sum á ein ella annan hátt merktu hendingina, at krevja endurgjald, so kann talan gerast um meir enn 200 milliónir kr., sigur advokaturin, Mads Pramming.

Kravið um endurgjald er sett fram, eftir at ein løgfrøðilig kanning, sum vinnumálaráðið bað um í september, kom til ta niðurstøðu, at Sjóvinnustýrið skuldi havt gjørt eitt havnaeftirlit umborð á Scandinavian Star í 1990. Tað átti at verið gjørt, áðrenn ferjan fór at sigla við ferðafólki í Danmark.

482 fólk vóru við ferjuni, tá ið hon náttina til 7. apríl í 1990 var á veg úr Oslo til Frederikshavn, tá eldur kom í. 159 fólk doyðu. Stórur ivi er um orsøkina, men eldurin kyknaði fleiri staðni um somu tíð, og tí verður hildið, at eldurin var ásettur.

Hvørki stjórin í Sjóvinnustýrinum, Andreas Nordseth, ella Simon Kollerup, arbeiðsmálaráðharri, vilja gera viðmerkingar til kravið, sum verður latið Sjóvinnustýrinum í morgin.