Annarhvør skoti hevði atkvøtt fyri tjóðskaparflokkinum

Annarhvør skoti hevði atkvøtt fyri skotska tjóðskaparflokkinum SNP, um valsigurin hevði endað við fullveldi. 

Tað vísir nýggj meiningakanning.

"Find Out Now for Channel Four" hevur gjørt kanningina.

1.006 veljarar vóru spurdir í tímunum beint eftir, at bretski hægstirættur hevði staðfest, at stjórnin í Westminister skal geva heimild til nýggja fólkaatkvøðu um loysing.

Av teimum spurdu, svaraðu 50 prosent, at tey fara at atkvøða fyri SNP á næsta vali, um sigurin hevur við sær, at Skotland loysir frá Bretlandi.

Búskapur og loysing

Spurd, hvat hevur størstan týdning fyri tey, svara 26 prosent loysing, 61 prosent skotski búskapurin og almennar tænastur, og 13 prosent vita ikki.

Dómararnir í hægstarætti vóru einmælt samdir í dóminum, at skotska parlamentið hevur ikki myndugleika at fara undir tilgongd at skipa fólkaatkvøðu um loysing frá Bretlandi.

Fyrstiráðharrin í Skotlandi, Nicola Sturgeon, sigur, at hon fer at stríðast fyri skotskari loysing, so leingi sum hon orkar. 

- Eg haldi fram at stríðast fyri grundleggjandi aðalregluni um frælsi, sigur Nicola Sturgeon.