Russland fær bara 1500 tons av makreli í altjóða sjógvi

NEAFC hevur avgjørt, at Russland bara skal fáa 1495 tons av makreli í altjóða sjógvi í ár.

Russland hevur av sínum eintingum givið sær 67.548 tons, 22,5 prosent, av tilmæltu heildarkvotuni.

Í NEAFC eru ES, Danmark fyri Føroyar og Grønland, Bretland, Noreg og Ísland.  

Uppskotið um lítlu russisku kvotuna kom frá ES.

Fáa ongar sømdir

NEAFC samtykti eisini, at russisk skip, sum fiska makrel, skulu ongar sømdir fáa frá limalondunum, eitt nú bunkring og umskiping.

ES, Bretland og Ísland ætla ikki, at hesi tiltøk bara skulu vera galdandi fyri altjóða sjógv.

Tey skulu eisini vera í teirra egna sjógvi.

Russland hevur mótmælt, men tiltøkini koma í gildi 28. august.