USA bannar innflutningi av samskiftistøkni úr Kina

Amerikanska stjórnin hevur bannað sølu og innflutningi av telesamskiftiseindum frá fimm kinesiskum tøknifyritøkum, ein teirra er Huawei.

Hetta er gjørt fyri at verja trygdina hjá tjóðini.

Tær fimm fyritøkurnar eru skuldsettar fyri at deila brúkaradátur við kinesiskar myndugleikar.

Leiðslan í amerikanska fjarskiftisstovninum FCC samtykti bannið einmælt fríggjadagin.

Umframt Huawei, er talan um feløgini ZTE, Hik-vision, Dahua og Hytera.

Telefyritøkurnar hava allar mótmælt banninum og siga seg onga ávirkan hava á tjóðartrygdina í USA, og at hetta fer at skaða brúkaran.

Fyritøkurnar eru skuldsettar fyri at lata stjórnini í Beijing dátur.

Ikki afturvirkandi gildi

Bannið hevur ikki afturvirkandi gildi, og tí kunnu fyritøkurnar framhaldandi selja vørur, sum longu eru góðkendar í landinum.

Óttin fyri kinesiskari tøkni er ikki nýggjur, og lond í Vesturheiminum hava tikið ymisk stig fyri at avmarka nýtsluna. 

Men bann sum hetta, er eindømi í USA, skrivar BBC.

Av dátutrygdarávum hevur USA bannað Huawei at seta upp 5G-net. 

Fleiri onnur lond hava gjørt tað sama, eitt nú Svøríki, Danmark og Kanada.