Innfluttu fyri eina milliard um mánaðin í fjør

Innflutningurin til og við november 2022 er nú gjørdur upp, og innflutt varð fyri 11,3 milliardir krónur.

Hetta er ein vøkstur á 33 prosent í mun til somu mánaðir árið fyri.

Um skip og flogfør ikki verða tald við, er vøksturin 23 prosent.

Innfluttu brennievni fyri 2,1 mia. kr.

Oljuprísurin er framvegis høgur, og hann sæst aftur í innflutninginum. 

Vit innfluttu brennievni fyri 2,1 milliard krónur fyrstu 11 mánaðirnar, ella fyri 75 prosent meira enn í sama tíðarskeiði í 2021, skrivar Hagstovan.

Innflutningurin er helst komin í hæddina nú, skrivar Hagstovan. 

Stóri vøksturin í innflutninginum seinastu mánaðirnar er nú minkandi. 

Innflyta lítið úr Russlandi

Eins og føroyingar framvegis útflyta til Russlands, er eisini innflutningur haðani, tó ikki stórur.

Hann var 223.000 kr. í november í fjør. Tað mesta er byggitilfar.